За нас

Препорака: додека читате "за нас" кликнете на Плеј.


МПЦО „Свети Кирил и Методиј” Штутгарт

Богатата библиотетска традиција на просторите на Република Македонија датира од времето на Св. Климент Охридски, чии корени досегаат до делото на сесловенските просветители, браќата Св. Кирил и Методиј. Голем е бројот на средновековни манастирски библиотеки, за чии фондови постојат материјални сведоштва, кои ги продолжиле традициите и ги сочувале верските книжевни дела на светите браќа.

Токму поради традиционалната карактеристика на македонската самобитност и имајќи ја во предвид големината на личноста и делото на светите браќа Кирил и Методиј, во Штутгарт, Германија се роди идејата за формирање на Македонска православна црковна општина, која го носи името на солунските браќа. Секако, мотив не беше само желбата луѓето да се здружат меѓу себе, туку и фактот, што на овие простори одлежал затвор Св. Методиј, осуден од страна на Бискупскиот суд во Регензбург, за ширење на ерес.

Македонското население на просторите на Јужна Германија опстојува повеќе од 40 години. Првиот поголем бран на Македонци кои се населиле на овие простори, е кон крајот на 60-тите и почетокот на 70-тите години од минатиот век. Практично, тоа е периодот кога голем број Македонци заминуваат на печалба низ земјите од Западна Европа и светот.
Со нивното доаѓање тука, секако дека потребата од меѓусебно дружење била повеќе од потребна, па затоа се организирале во разни организации, клубови и други форми на дружење, каде ги одржувале и негувале културата и традицијата од нивната родна земја.

Што се однесува до црковниот живот, мора да се кажи дека во почетокот истиот не бил организиран и дури негде во средината на 80-тите и почетокот на 90-тите години почнала да се јавува желба за формирање на црковни општини, каде што нашите луѓе ќе ги задоволуваат своите духовни потреби.

Идејата за формирање на црковна општина во Штутгарт беше одамнешна. Требаше само да се најде погоден момент за нејзина реализација.
Така на почетокот во далечната 1983 година во приватен дом се собраа неколку Македонци, кои се обврзаа дека ќе работат активно за формирање на МПЦО во Штутгарт. Веќе на наредниот состанок од истите луѓе,се формира Иницијативен одбор, кој се обврза да ги реализира следните задачи:

  1. Да се информираат сите Македонци во Штутгарт и околината за потребата од формирање на македонска црковна општина во Штутгарт.
  2. Да се извести С.А.С. На М.П.Ц. и да се побара благослов за формирање на црковна општина во Штутгарт.
  3. Да се свика основачко собрание и да се избере управен одбор.
  4. Да се предложи име на црковната општина.
  5. Да се најде црковна просторија каде ќе се одржуваат богослужбите.
  6. Да се подготват сите потребни документи за регистрација на црковната општина.

Задачите полека се реализираа и на 17.03.1983 година во просториите на Руската црква во Штутгарт се одржа основачко собрание, а потоа и првата богослужба. Присутните исто така решија оваа црковна општина да го носи името Свети Кирил и Методиј.

До 1992 година богослужбите се одржуваа во Алткатолише кирхе во Штутгарт, со тукашниот свештеник Ратко Настески, а од есента 1993 година па до денес богослужбите се одржуваат во евангелистичката црква ,,Св.Јоханес” во Stuttgart – Zuffenhausen.

Пролетта 1994 година во посета на црковната општина беше дојден тогашниот поглавар на МПЦ господин господин Михаил, на иницијатива од нашата црковна општина во Маинц се оснива и Епархијата за Европа, на која покасно и се одреди седиште во Дортмунд.

Од 1983 до 1995 година по потреба на Богослужбите наизменично доаѓаа свештеници од Македонија. Кога отец Мирко Пешовски дојде во Минхен и ја основа Јужногерманската парохија, во која останува до 2002 година. По него доаѓа отец Александар Ристевски па се до крајот на 2006 година. Од почетокот на 2007 година па се до ден денес наш парохиски свештеник е отец Миле Велјановски.

Денес на територијата на Јужна Германија опстојуваат 6 црковни општини кои од 1996 година се обединети во една парохија.









ПИМЕН



ВЛАДИКА на МПЦ - ОА, митрополит на европската епархија




Негово Високопреосвештенство Митрополит Европски Господин Пимен
Роден во Ресен во 1971 година
Зборува Француски и Англиски, а се служи и со Руски јазик.
Уште како студент на Теолошкиот факултет, кај него се родила желбата да отиде во манастир, па по завршување на трета година факултет, заминал во Водочкиот манастир во Струмица во 1997 година, каде и го добил монашкиот потстриг.
Набрзо потоа, станал игумен на истиот манастир, период кога и вонредно го завршил Теолошкиот факултет. На предлог на Синодот на МПЦ, како Архимандрит, заминал во Париз во 2004 година, на постдипломски студии на „Св. Сергеј“ факултетот, каде и ја обавува парохиската служба во тамошната црковна општина.
За време на студиите, г. Пимен е хиротонисан, заедно со Методиј и Климент, при што станува викарен епископ Пољански и како таков е ракоположен на соборот на сите Македонски светии во октомври 2005 година во „Св. Софија“ во Охрид. Најпосле на 6 април 2006 е поставен за митрополит Европски, при што го сели седиштето на епархијата во Малме, Шведска.
Како митрополит, по барање на некои дневни весници и интернет портали пишува и колумни секогаш со теолошка содржина и смисла. Како плод на ова творење 2011 година ја издаде и збирката колумни со еклезијастички дух „Што напишав напишав“

Св. Кирил и Методиј Штутгарт

Адреса


Ilsfelder Straße 10
70435 Stuttgart

Контакт


Можност за донирање на банковно конто


Mazedonische Orthodoxe kirchliche Gemeinde
St. Kiril und Metodij e.V.

IBAN: DE40600501010001180699
BIC: SOLADEST600
Име на Банка: BW-Bank Stuttgart